Target ng Taytay District Jail na maiparehistro sa Social Security System (SSS) ang lahat ng 39 Persons Deprived of Liberty (PDL) sa pasilidad upang mapalawak ang kanilang access sa social protection at masuportahan ang kanilang pagbabalik sa lipunan.
Ayon sa Bureau of Jail Management and Penology (BJMP) Taytay, unang nakatanggap ng kanilang SSS Membership Data Record (MDR) ang walong lalaking PDL bilang patunay ng kanilang opisyal na pagpaparehistro sa ahensya.
Ipinamahagi ang mga dokumento noong August 14 sa pangunguna nina Acting Jail Warden SJO4 Barbara Lim at Help Desk Officer JO1 Ma. Mique C. Gastilo. Nairehistro sa SSS ang walong PDL noong July 20.
Sinabi ng BJMP Taytay na layunin ng programa na mabigyan ang mga PDL ng access sa kanilang membership information at malaman ang mga benepisyong maaari nilang makuha kung kuwalipikado.
“Nilalayon ng inisyatibang ito na itaguyod ang panlipunan at pinansyal na kapakanan ng mga taong pinagkaitan ng kalayaan o tinatawag na Persons Deprived of Liberty (PDL), mapalawak ang kanilang access sa social protection, at masuportahan ang kanilang rehabilitasyon at matagumpay na muling pagsasama sa lipunan,” ayon sa BJMP Taytay.
May 39 na PDL sa Taytay District Jail, kabilang ang 38 lalaki at isang babae.
