Nais ni Sen. Erwin Tulfo na ideklarang persona non grata si Chinese Ambassador Jing Quan kasunod ng pahayag nitong madaling mananalo ang China kung gagamit ito ng puwersa laban sa Pilipinas.
Sa Senate Resolution No. 739 na inihain nitong Lunes, hinimok ni Tulfo, vice chairperson ng Senate committee on foreign relations, ang Department of Foreign Affairs (DFA) na irekomenda sa mga kinauukulang awtoridad ang pagpapaalis sa embahador dahil sa posibleng epekto ng kaniyang mga pahayag sa soberanya at pambansang seguridad ng bansa.
Ayon kay Tulfo, nagdulot ang mga pahayag ni Jing ng “serious concerns over the propriety of diplomatic conduct and its implications for Philippine sovereignty and national security.”
Binigyang-diin din ng senador na dapat nakabatay sa paggalang sa isa’t isa, makabuluhang pakikipag-ugnayan at mapayapang pag-uusap ang diplomatikong ugnayan ng Pilipinas at China.
Nag-ugat ang kontrobersiya sa panayam kay Jing na ibinahagi sa social media ni Philippine Coast Guard spokesperson for the West Philippine Sea Rear Admiral Jay Tarriela.
