Arestado ang isang suspek dahil sa paglabag sa Comprehensive Dangerous Drugs Act sa Barangay Poblacion 5, Coron, Palawan noong September 29, bandang 11:50 ng gabi.
Kinilala siya na si alyas June, 39, at residente ng Brgy. 1, El Nido, Palawan. Samantala, pinaghahanap pa ang isa pang suspek na si alyas Akong na nakatakas sa lugar.
Ayon sa Coron Municipal Police Station (MPS), nakatanggap sila ng impormasyon na may nagaganap na pot session at repacking ng hinihinalang shabu sa bahay ng isang alyas Baby sa Brgy. Poblacion 5, Coron.
Rumesponde ang mga pulis upang magsagawa ng imbestigasyon. Pagdating sa lugar, nakita ng mga awtoridad na bukas ang pintuan ng kwarto kung saan nila nadatnan ang mga suspek na aktwal na gumagamit at nagre-repack ng ilegal na droga.
Agad nilang inaresto si alyas June habang nakatakas si alyas Akong.
Narekober mula sa suspek ang anim na pirasong heat-sealed transparent plastic sachet na naglalaman ng white crystal substance na hinihinalang shabu, na may timbang na 2.8 gramo at tinatayang nagkakahalaga ng ₱9,000 sa merkado.
Kasama rin sa mga nakumpiska ang iba’t ibang paraphernalia para sa paggamit ng shabu.
Dinala ang suspek at mga nakumpiskang ebidensya sa Coron MPS para sa karampatang disposisyon at pagsasampa ng kaukulang kaso.
