Isinusulong ng lokal na pamahalaan ng Narra, Palawan, ang pagpapalawak ng ekonomiya ng bayan sa pamamagitan ng negosyo, kalakalan, turismo at pamumuhunan, bukod sa pagiging kilala nito bilang “Rice Granary” ng lalawigan.
Ito ang binigyang-diin ni Acting Municipal Mayor Edmond Gastanes sa dalawang araw na Business and Investment Forum noong Oktubre 19–20, na may temang “Growing Together: Connecting Business and Investment Opportunities in Narra.”
Dinaluhan ang forum ng mga lokal na negosyante, may-ari ng negosyo, mamumuhunan at mga nagnanais magsimula ng negosyo upang magpalitan ng ideya at bumuo ng mga ugnayang maaaring magbukas ng oportunidad sa pamumuhunan.
“Hindi lamang tayo bayan ng palay. We are also a municipality with great potential for business, trade, tourism, entrepreneurship, and investment. We have hardworking and talented people, valuable natural resources, and a community that is ready to embrace progress and development,” pahayag ni Gastanes.
Kabilang sa mga hakbang na isinusulong ng lokal na pamahalaan at ng Local Economic Development and Investment Promotions Office (LEDIPO) ang pagpapatupad ng Commercialization Ordinance na ipinasa ng Sangguniang Bayan at pagbubukas ng Narra Local Products Ani at Likha Center.
Magsisilbing lugar ng pagpapakita at pagbebenta ng mga lokal na produkto ang Ani at Likha Center, na inaasahang makatutulong sa pagpapalawak ng merkado para sa mga produktong gawa ng mga taga-Narra.
Ayon kay Gastanes, layunin ng mga inisyatiba na lumikha ng trabaho at kabuhayan para sa mga residente at mapalawak ang pinagkakakitaan ng mga magsasaka.
“Ang tunay na pag-unlad ay hindi lamang nasusukat sa dami ng negosyong naitatayo o puhunan na pumapasok, kundi sa dami ng buhay na nababago, trabahong nalilikha, at pamilyang nagkakaroon ng mas magandang kinabukasan,” dagdag ng alkalde.
Ayon pa kay Gastanes, inaasahang magtutulungan ang mga tanggapan ng lokal na pamahalaan, Sangguniang Bayan at pribadong sektor upang matulungan ang mga lokal na negosyanteng mapalawak ang kanilang operasyon at makapag-ambag sa ekonomiya ng Narra.
—
