Limang bala ng caliber .45 at mga hinihinalang drug paraphernalia ang nasamsam umano ng pulisya matapos arestuhin ang isang 48-anyos na magsasaka dahil sa reklamong grave threats sa Barangay Poblacion, Taytay, Palawan noong August 17.
Ayon sa Taytay Municipal Police Station (TMPS), nakipag-ugnayan ang mga pulis sa mga opisyal ng barangay bago puntahan ang inirereklamong lalaki at isagawa ang pag-aresto.
Sa paghahalughog umano sa bahay ng suspek, nakuha ng mga awtoridad ang limang bala ng caliber .45, isang digital weighing scale, dalawang patalim, dalawang improvised glass tooter, isang metal cap na hinihinalang ginagamit sa pag-init ng ilegal na droga, tatlong lighter at isang laptop bag.
Inihahanda ng pulisya ang mga reklamong grave threats at paglabag sa Section 12, Article II ng Republic Act No. 9165, o Comprehensive Dangerous Drugs Act of 2002; RA 10591, o Comprehensive Firearms and Ammunition Regulation Act; at Batas Pambansa Blg. 6.
Ihahain ang mga reklamo sa Office of the Provincial Prosecutor ng Palawan.
Sinabi ng pulisya na isusumite sa Palawan Provincial Forensic Unit ang mga nakumpiskang bagay para sa pagsusuri. Hindi nakasaad sa ulat kung may search warrant ang mga awtoridad o kung may baril na nakuha kasama ng mga bala.
