Natapos ang pagtatago ng isang lalaking itinuturing na most wanted person sa Brooke’s Point matapos siyang silbihan ng warrrant ng mga pulis at arestuhin dahil sa reklamong child abuse sa Barangay Poblacion District I noong June 22.
Kinilala ng pulisya ang suspek sa alyas na “Mark,” 20. Inaresto siya sa bisa ng warrant para sa paglabag sa Section 5(b) ng Republic Act No. 7610, o ang Special Protection of Children Against Abuse, Exploitation and Discrimination Act.
Ayon sa mga awtoridad, kabilang ang suspek sa mga most wanted persons sa bayan ng Brooke’s Point.
Wala namang itinakdang piyansa ang Regional Trial Court Branch 165 ng Brooke’s Point para sa pansamantala niyang kalayaan.
Pinangunahan ng mga tauhan ng Brooke’s Point Municipal Police Station ang operasyon sa pakikipagtulungan ng Provincial Intelligence Unit ng Palawan Police Provincial Office at ng 2nd Special Operations Unit ng Maritime Group.
Kasalukuyang nasa kustodiya ng Brooke’s Point MPS ang suspek habang inihahanda ang mga dokumentong kailangan para sa pagdinig ng kaso sa korte.
