Arestado ang 43-anyos na si Alfie Bermejo matapos mahuli sa isang buy-bust operation ng Philippine Drug Enforcement Agency (PDEA)-Palawan at Police Station 2 (PS 2) sa Villa Manuel, Dacanay Road, Barangay San Manuel, bandang 10:45 kagabi, November 26.
Nahuli si Bermejo matapos umano itong mabilhan ng isang sachet ng pinaghihinalaang shabu. Ayon sa PDEA, ang suspek, na residente ng New Buncag, Barangay Mandaragat, ay nasa lugar para sa isang transaksyon kaugnay sa ilegal na droga.
Depensa naman ni Bermejo, dumaan lang umano siya sa lugar matapos bisitahin ang isang kaibigan. Aniya, bumaba lamang siya sa tindahan upang bumili ng sigarilyo nang siya ay mahuli ng mga operatiba.
Nakuha mula sa suspek ang ₱2,500 na marked money, isang cellphone, at ang motorsiklong ginamit nito sa transaksyon.
Umamin si Bermejo na gumagamit siya ng droga ngunit mariing itinanggi ang alegasyon na siya ay nagbebenta nito.
