Bumungad sa unang araw ng klase noong June 8 ang kakulangan ng silid-aralan sa Sta. Cruz Integrated School sa Barangay Sta. Cruz, kung saan napilitan ang mga guro na gumamit ng iba’t ibang pasilidad ng paaralan bilang makeshift classrooms.
Sa privilege speech ni Vice Mayor Jimbo Maristela, ibinahagi niya ang sitwasyon ng paaralan na mayroon lamang dalawang standard classrooms para sa humigit-kumulang 260 na mag-aaral.
Dahil dito, ginagamit na rin bilang silid-aralan ang gymnasium, stage, canteen, clinic, library, at ICT room.
“Napilitan na lamang gamitin ng mga guro ang kanilang covered gymnasium para magamit sa mga klase,” ani Maristela.
Ayon pa sa kanya, umiikot ang gamit ng mga espasyo: ang ilang grade level ay nasa standard classroom, habang ang iba ay nasa canteen, mini-gym, ICT room, at library.
“Sa kasalukuyan, sila ay may dalawa lamang standard classrooms kaya ginagamit na nila ang kanilang mini gym at stage bilang classroom,” dagdag niya.
May mga mag-aaral din na inilagay sa clinic at makeshift classrooms na itinayo gamit ang lumang materyales at donasyon mula sa komunidad.
“Ang kanilang makeshift classroom para sa Grade 8 ay gawa lamang sa mga nasirang materyales, habang ang ibang gamit ay mula sa pagtutulungan at donasyon,” ayon pa sa bise alkalde.
Dahil dito, sinabi ni Maristela na maghahain siya ng resolusyon sa Local School Board para sa dagdag na apat na classrooms sa naturang paaralan.
Umaasa siya na mabibigyan ng pondo ang proyekto upang maibsan ang kakulangan sa silid-aralan at mapabuti ang kondisyon ng pag-aaral ng mga estudyante.
