Arestado ng mga awtoridad ang isang lalaking itinuturing na high-value suspect sa Brooke’s Point matapos ang operasyon sa Barangay Pangobilian nitong Martes ng hapon, June 9.
Kinilala ng Brooke’s Point Municipal Police Station ang suspek sa alyas “Jay,” 32 taong gulang, residente ng Sitio Santo Niño, Barangay Rio Tuba sa Bataraza.
Isinagawa ang pag-aresto bandang 1:43 p.m. sa bisa ng warrant of arrest na inisyu noong May 21, 2026 ng Regional Trial Court Branch 165 sa Brooke’s Point.
Nahaharap ang suspek sa kasong Acts of Lasciviousness sa ilalim ng Article 336 ng Revised Penal Code, kaugnay ng Section 5(b) ng Republic Act 7610 o Special Protection of Children Against Abuse, Exploitation and Discrimination Act.
Itinakda ng korte ang piyansang ₱200,000 para sa pansamantalang kalayaan ng suspek, habang nasa kustodiya na siya ng Brooke’s Point MPS para sa dokumentasyon at kaukulang proseso.
