Pinag-aaralan ng Department of Education (DepEd) ang pagbawas sa teaching load ng mga guro upang magkaroon sila ng mas maraming oras para tutukan ang psychosocial well-being ng kanilang mga estudyante, ayon sa isang opisyal noong Biyernes.
Sinabi ni Education Undersecretary Malcolm Garma na bumabalangkas na ang DepEd ng policy para sa posibleng pagbabawas ng teaching load kasunod ng mga insidente ng pamamaril sa mga paaralan ngayong taon na ikinasawi at ikinasugat ng ilang estudyante.
“Bumabalangkas kami ngayon ng mga patakaran at polisiya kung pwedeng bawasan yung teaching load ng teachers natin para sa ganon makatutok sila sa psychosocial well being ng kanilang mga mag-aaral,” ani Garma sa state-run PTV.
Hindi nagbigay si Garma ng detalye kung gaano kalaki ang posibleng bawas sa teaching load o kung kailan ito ipatutupad.
Bukod sa physical security sa mga paaralan, sinabi niyang nakikita rin ng DepEd ang pangangailangang palawakin ang mga programa nito para sa digital safety ng mga estudyante at school personnel.
“Nakita natin na hindi lang yung pisikal na paghahanda ng mga paaralan ang kailangan natin para maiwasan ang mga shooting incident sa mga paaralan,” ani Garma.
Ayon sa opisyal, sinusuri rin ng DepEd ang papel ng online groups sa paghubog ng ilang estudyante, kabilang ang mga nasasangkot sa insidente ng karahasan.
“Nakita natin na malaking bahagi ng impluwensya sa mga mag-aaral, especially yung perpetrators, ay may kinalaman sa online, sa kanilang pagsama sa mga online groups,” dagdag niya.
Sinabi rin ni Garma na mayroon nang sanctions ang DepEd para sa mga estudyanteng mapatutunayang sangkot sa cyberbullying.
Ang digital safety module ay hindi gagawing hiwalay na asignatura. Sa halip, isasama ito sa iba’t ibang learning systems ng DepEd.
