Maaaring magsimulang bumalik sa dating antas ang presyo ng ilang gulay sa loob ng tatlong linggo hanggang isang buwan habang bumabawi ang produksyon mula sa pinsalang dulot ng malalakas na ulan at pagbaha, ayon sa Department of Agriculture (DA).
Sinabi ni DA spokesperson Assistant Secretary Arnel de Mesa na nakadepende ang bilis ng pagbaba ng presyo sa kung gaano kabilis makapagtanim muli ang mga magsasaka sa mga lugar na naapektuhan ng masamang panahon.
“Siguro mga three weeks to one month iyan, mag-start tayo na makikita ng recovery,” ani De Mesa sa Philippine News Agency.
Ayon sa DA, nasa 10% hanggang 15% ang itinaas ng presyo ng mga sangkap ng pinakbet at ilang lowland at upland vegetables sa mga pamilihan.
Kabilang dito ang talong na tumaas umano ng ₱20 hanggang ₱50 kada kilo.
“May mga paggalaw na, halimbawa, ‘yung sa talong tumataas ng ₱20 hanggang PHP50 kada kilo. Ganun din ‘yung ibang gulay, for both lowland and upland ito,” sabi ni De Mesa.
Malaki ang naging epekto ng pag-ulan at pagbaha sa produksyon ng high-value crops, partikular sa Central Luzon at Calabarzon.
Sa Central Luzon, umabot sa ₱237 milyon ang halaga ng pinsala, pinakamalaki sa Pampanga na nagtala ng ₱128 milyon. Sinundan ito ng Bulacan na may ₱45 milyon, Nueva Ecija na ₱37 milyon at Bataan na ₱19 milyon.
Sa Calabarzon, nasa ₱172 milyon ang kabuuang pinsala sa high-value crops. Pinakamalaki ang naitala sa Batangas na ₱71.6 milyon, kasunod ang Cavite na ₱44.5 milyon, Rizal na ₱30 milyon at Laguna na ₱25 milyon.
Habang hindi pa tuluyang nakakabawi ang mga pangunahing lugar na pinagkukunan ng gulay, sinabi ng DA na maaaring gamitin ang mga lugar na mas kaunti ang pinsala bilang alternatibong source ng high-value crops.
Inaasahang makatutulong ito upang matugunan ang suplay sa mga pamilihan habang unti-unting bumabalik ang produksyon sa mga lugar na tinamaan ng masamang panahon.
