Mawawalan ng kuryente nang 13 oras ang ilang bahagi ng Puerto Princesa City, kabilang ang lahat ng barangay sa poblacion, sa Linggo, October 25, dahil sa nakatakdang maintenance ng Delta P, Palawan Electric Cooperative (PALECO), at National Power Corporation (NPC).
Ayon sa abiso ng PALECO, magsisimula ang brownout nang alas-4 ng madaling araw at tatagal hanggang alas-5 ng hapon.
Sakop nito ang lugar mula Sitio Magarwak sa Barangay Bacungan hanggang Barangay Sta. Lourdes; ilang bahagi ng Sicsican at Irawan; mga barangay ng Sta. Monica, Tiniguiban, Tagburos, San Jose, San Manuel, San Pedro, at San Miguel; at lahat ng barangay sa poblacion o sentro ng lungsod.
Pansamantalang ihihinto ng Delta P ang operasyon ng buong planta para sa preventive maintenance, pagkakabit ng medium-voltage switchgear, at pagpapalawak ng busbar.
Kasabay nito, ipagpapatuloy ng PALECO ang taunang pagsusuri at maintenance ng mga kagamitan sa substation nito na may dalawang 25 MVA transformer, gayundin ang maintenance ng mga linya ng distribusyon.
Magkakabit naman ang NPC ng mga kagamitang panangga sa kidlat sa 69-kilovolt transmission line sa pagitan ng Irawan at Delta P. Magsasagawa rin ito ng maintenance sa linya sa pagitan ng NPC Irawan Switching Station at PALECO Substation.
Samantala, dalawang magkahiwalay na brownout ang nakatakda sa Roxas, Taytay, mainland Dumaran, at mga lugar mula Sitio Magarwak sa Barangay Bacungan hanggang Barangay Langogan na sakop ng Lucbuan Feeder 1 at 2.
Mawawalan ng kuryente ang mga nasabing lugar mula alas-4 hanggang alas-9 ng umaga para sa pagkakabit ng NPC ng bypass connection sa pagitan ng CB11 at CB12.
Muli silang mawawalan ng kuryente mula alas-2 hanggang alas-5 ng hapon para sa pagtanggal ng nasabing koneksyon.
Para sa mga katanungan, maaaring tumawag sa PALECO sa 453-2001, 0917 553 2836, o 0908 892 6584.
