Isang undercover police officer ang nakabili umano ng unlicensed firearm mula sa isang lalaki sa Puerto Princesa City, na nauwi sa pagkakaaresto sa suspek sa buy-bust operation sa Barangay Bancao-Bancao noong Setyembre 24.
Ayon sa Puerto Princesa City Police Office (PPCPO), isinagawa ng City Intelligence Unit, katuwang ang Police Station 1, ang operasyon bandang 7:23 ng gabi.
Nagpanggap na buyer ang isang police operative at nakipagtransaksyon sa suspek para bumili ng baril.
Matapos umano maibenta at maiabot ang firearm, ibinigay ng operative ang pre-arranged signal at agad na inaresto ng operating team ang lalaki.
Narekober ng mga awtoridad ang firearm na ginamit sa transaksyon, buy-bust money at iba pang ebidensya.
Ang suspek, na residente ng Barangay San Miguel, ay dinala sa Police Station 1 para sa proper disposition.
Inihahanda na rin ng pulisya ang kasong paglabag sa Republic Act No. 10591, o Comprehensive Firearms and Ammunition Regulation Act.
Samantala, sinabi ni PPCPO City Director Police Colonel Vincent C. Templo na layunin ng operasyon na mapigilan ang ilegal na bentahan at pag-ikot ng mga baril sa komunidad.
“Illegal firearms can easily become instruments of crime when they are placed in the wrong hands. This operation demonstrates our commitment to taking unauthorized firearms out of circulation and holding those who violate our firearms laws accountable,” ani Templo.
“We will continue to pursue focused and intelligence-driven operations to protect our communities,” dagdag niya.
