Ni-raid ng mga pulis ang isang tupada sa Enrique Road, Barangay Samariñana, sa Brooke’s Point nitong Linggo, August 16, matapos makatanggap ng impormasyon mula sa isang confidential informant.
Nahuli sa operasyon ang isang 56 anyos na magsasaka mula Barangay Salogon. Nakatakas naman si alyas “Rony,” isa ring magsasaka na taga-Samariñana.
“Illegal cockfighting will not be tolerated, as it undermines public order and the rule of law,” ayon kay Palawan Police Provincial Office (PalPPO) Director Col. Joel Casupanan.
Hinikayat din niya ang mga residente na ipagpatuloy ang pagbibigay ng impormasyon sa pulisya tungkol sa mga iligal na aktibidad.
Pagdating sa lugar, nakumpirma umano ng mga tauhan ng Brooke’s Point Municipal Police Station na may nagaganap na iligal na sabong.
Nakuha ng mga pulis ang tatlong buhay na manok panabong, dalawang basket, isang tari na nasa lalagyan, electrical tape, tali ng tari, dalawang panali ng manok, at ₱300 na perang pantaya.
Dinala sa Brooke’s Point police station ang nahuling suspek at mga nakumpiskang gamit para sa dokumentasyon at kaukulang disposisyon. Inaalam pa ng mga pulis ang kinaroroonan ni Rony.
Mahaharap ang nahuling magsasaka sa reklamong paglabag sa Presidential Decree No. 1602, na nagpapataw ng parusa sa sinumang direktang, o hindi direktang nakikibahagi sa iligal, o hindi awtorisadong sabong at iba pang uri ng sugal.
Sa ilalim ng batas, maaaring managot hindi lamang ang tumataya kundi pati ang nagpapatakbo, o nagpapanatili ng lugar ng sugal.
