Nagsisimula nang magpakita ng resulta ang Herds Health and Genetics Improvement Program ng Provincial Veterinary Office (PROVET), matapos makapagtala ng 17 produksyon ng baka at kalabaw sa Sofronio Española at El Nido mula 2025 hanggang 2026.
Ayon sa PROVET, bunga ito ng patuloy na pagpapatupad ng Animal Breeding Upgrading Program o artificial insemination na naglalayong mapaganda ang lahi ng mga baka at kalabaw at mapataas ang kanilang produksyon.
Kasabay ng breeding program, naghatid rin ang PROVET ng iba pang serbisyong beterinaryo sa dalawang bayan sa ilalim ng Herds Health and Genetics Improvement Program.
Sa kabuuan, 247 magsasaka ang nakinabang sa programa. Umabot naman sa 234 na baka at kalabaw ang sumailalim sa artificial insemination, habang 524 na alagang hayop ang napurga at nabigyan ng bitamina at iba pang serbisyong pangkalusugan.
Ayon sa tanggapan, layunin ng programa na mapabuti ang kalusugan at kalidad ng mga alagang hayop upang makatulong sa pagpapataas ng produksyon at kita ng mga magsasaka.
Ang programa ay bahagi ng PALAWAN+PLUS Development Agenda ni Governor Amy Roa Alvarez na nakatuon sa pagpapaunlad ng sektor ng paghahayupan at pagpapalakas ng kabuhayan ng mga magsasaka sa lalawigan.
