Aprubado na ng Sangguniang Bayan ang isang ordinansa na naglalayong magtayo ng isang Municipal Food Park sa bayan ng Brooke’s Point upang matulungan ang mga lokal na negosyante at ilang mga micro and small enterprises (MSEs) dito.
Isang sentralisado at maayos na puwesto ang nais na maibigay ng Lokal na Pamahalaan para sa mga maliliit na negosyo, partikular ang mga nagtitinda ng pagkain sa kanilang bayan.
Ayon sa proponent ng ordinansa, malaki ang maitutulong ng proyekto sa pag-angat ng antas ng pamumuhay sa lugar at magkaroon ng sapat na kita na maaring makakatulong sa kanilang pamilya.
“Inaasahan din na magbibigay ito ng mas maraming oportunidad sa kabuhayan, magpapalago sa lokal na ekonomiya, at magiging bagong destinasyon para sa pagkain at turismo sa ating bayan,” pahayag ng opisyal.
Samantala, kasalukuyan nang pinag-aaralan ng lokal na pamahalaan ang angkop na pagdadalhan sa naturang pasilidad upang matiyak na magiging maayos, maganda at kapaki-pakinabang ang lokasyon nito para sa publiko at sa mga mamimili.
