Ang mga estudyanteng gumagamit ng ABM Building (Tower C) at HUMSS Building (Tower D) sa Palawan National School (PNS) ay pansamantalang nasa asynchronous learning simula pa kahapon hanggang ngayong araw, July 3, habang isinasagawa ang preventive engineering inspection sa dalawang gusali.
Sa advisory na inilabas ng paaralan nitong Thursday, sinabi ng PNS na isasagawa ang inspeksyon katuwang ang Department of Public Works and Highways (DPWH), Puerto Princesa City Engineering Office, at DepEd Engineering Section bilang bahagi ng mga hakbang upang mas matiyak ang kaligtasan sa loob ng campus.
Layunin ng inspeksyon na suriin ang structural condition ng mga gusali at tiyaking ligtas pa rin itong gamitin ng mga estudyante, guro, at iba pang school personnel. Kasunod ito ng naunang isinagawang inspeksyon sa STEM Building ng paaralan.
Habang nasa asynchronous learning, magbibigay ang mga guro ng learning activities at mga instruksyon sa pamamagitan ng opisyal na communication platforms ng bawat klase upang magpatuloy ang pag-aaral ng mga estudyante.
Ayon kay School Principal IV Jabel Anthony Nuñala, bahagi lamang ito ng pag-iingat ng paaralan.
“Nais naming bigyang-diin na ang hakbang na ito ay isang preventive at precautionary safety measure lamang. Wala pong dapat ikabahala ang ating mga magulang at mag-aaral, sapagkat ang inspeksyong isinasagawa ay bahagi ng responsableng pamamahala ng paaralan upang matiyak na ang lahat ng ating mga gusali ay ligtas gamitin,” ayon sa kanya.
Ipinaliwanag din ng PNS na ang pansamantalang pagbabago sa learning modality ay “should not be interpreted as an indication of immediate danger,” at ang anumang susunod na hakbang ay ibabatay sa opisyal na rekomendasyon ng mga engineering authorities, kasama ang koordinasyon sa DepEd Division Office.
Hinikayat din ng paaralan ang mga magulang, estudyante, at publiko na umasa lamang sa mga opisyal na advisory at iwasang magbahagi ng hindi beripikadong impormasyon na maaaring magdulot ng hindi kinakailangang pangamba o kalituhan.
