Umabot sa 147 mag-aaral mula sa iba’t ibang paaralan sa Bataraza, Palawan, ang nakinabang sa libreng gabay sa pagbasa sa pamamagitan ng Community Brigada Pagbasa na nilahukan ng mga tauhan ng 1st Palawan Provincial Mobile Force Company (PMFC) noong Oktubre 17.
Ayon sa 1st Palawan PMFC, bahagi ang aktibidad ng ikaanim na batch ng programa na naglalayong tulungan ang mga batang nahihirapang bumasa upang makahabol sa kanilang mga kaklase.
Inilarawan ng pulisya ang programa bilang isang best practice at personal na inisyatibo ng isang guro sa labas ng regular nitong oras ng pagtuturo. Accredited din umano ito ng Department of Education (DepEd).
Katuwang ng mga tauhan ng 1st Palawan PMFC sa aktibidad ang 33 volunteer teachers at mga graduating college student na tumulong sa pagtuturo at paggabay sa mga mag-aaral.
Binigyang-diin ng pulisya ang kahalagahan ng pagtutulungan ng mga guro, boluntaryo, kapulisan at komunidad upang matugunan ang pangangailangan ng mga batang nangangailangan ng dagdag na suporta sa pag-aaral.
“Sa pamamagitan ng pagtutulungan ng kepulisya, mga guro, boluntaryo, at ng buong pamayanan, matutulungan natin ang mga mag-aaral na nahihirapan na magkaroon ng kumpiyansa sa sarili, mapalakas ang kanilang kaalamang akademiko, at magsikap para sa mas maliwanag na kinabukasan,” ayon sa pahayag ng 1st Palawan PMFC.
Ayon pa sa yunit, layunin din ng programa na iparamdam sa mga bata na may mga taong handang gumabay at sumuporta sa kanilang pag-aaral at mga pangarap.
