Kailangan pang dumaan sa budget deliberation at pag-apruba ng pondo ang panukalang ₱6,000 quarterly allowance para sa mga kwalipikadong senior citizen, PWD, solo parent, at barangay tanod sa Puerto Princesa bago ito maipatupad sa 2027.
Natalakay na sa Sangguniang Panlungsod ang panukalang doblehin ang kasalukuyang ₱3,000 allowance kada tatlong buwan sa ilalim ng Mapagkalingang Programa, ayon sa City Information Office (CIO).
Ayon kay Councilor Jonjie Rodriguez, magsisimula sa susunod na buwan ang budget deliberation para sa susunod na taon.
“Beginning next month magsisimula na kami ng budget deliberation,” ani Rodriguez.
Nakatakdang suriin ng Committee on Appropriations ang panukala para sa pagsasama nito sa 2027 annual budget ng city government.
Sa panayam, tinukoy ni Rodriguez ang ₱6,000 bilang allowance na isinusulong para sa mga benepisyaryo sa susunod na taon.
“Yes, may next year. Lahat sila, 6,000 ang kanilang allowance,” aniya.
Layunin ng pagtaas na makatulong sa mga benepisyaryo sa pagharap sa presyo ng mga bilihin at iba pang pangangailangan.
Panukala pa lamang ang ₱6,000 allowance at kailangan pang dumaan sa pagsusuri at budget deliberation.
Kasama sa mga susunod na pagdinig ang bilang ng barangay tanod na maaaring saklawin ng programa.
May itinakdang bilang ng mga tanod na kinikilala para sa ilang benepisyo, ngunit may mga barangay na nangangailangan ng mas marami dahil sa lawak ng kanilang nasasakupan.
Pag-aaralan din ang paggamit ng digital o ATM-based na sistema para sa pag-credit ng allowance sa mga account ng kwalipikadong benepisyaryo.
Nauna nang inanunsyo ni Mayor Lucilo Bayron ang planong itaas sa ₱6,000 ang quarterly allowance ng senior citizens, PWDs, at solo parents sa 2027.
Kasabay nito, sinabi niyang sisimulan sa fourth quarter ng 2026 ang digital payout bilang paghahanda sa pagtaas.
Ginawa ni Bayron ang anunsiyo sa pamamahagi ng allowance noong August 22 at 23.
