Pinagpapaliwanag ng Department of Trade and Industry (DTI)-Palawan ang mga tindahan tungkol sa mga presyong napupuna sa kanilang pagmamanman, habang naghahanda ang ahensya sa pag-inspeksyon ng mga produktong pang-Pasko sa November at December.
Ayon kay DTI-Palawan Provincial Director Hazel DP Dalvador, nagpapadala sila ng Letter of Inquiry sa mga establisimyento kapag lumampas ang presyo sa tinukoy niyang 10% na antas, kahit ilang sentimo lamang ang sobra.
“Mula 10 centavos lang na lumampas dun sa 10%, pinapadalahan na po namin agad ng Letter of Inquiry… ultimo 10 centimo, 50 centimo, 25 centimo, 30 centimo, 40 centimo, tinatanong na namin yun,” ani Dalvador sa Kapihan sa PIA noong October 1.
Saklaw ng pagmamanman ang mga supermarket at iba pang tindahan. Sa pamamagitan ng sulat, hinihingan ng paliwanag ang mga negosyo tungkol sa kanilang presyo.
Sinabi ni Dalvador na may mga tindahang nagsusumite ng mga dokumento bilang suporta sa kanilang paliwanag. Mayroon ding umaaming nagkamali sa paglalagay ng presyo at itinatama ito.
“…So immediately tinatanggal nila, binabago nila yung mga presyo. So far po sa experience po sa ating mga mino-monitor, registered malalaking establishments… sumusunod po talaga sila,” aniya.
Sa November at December, tututukan naman ng DTI-Palawan ang mga produktong pang-Noche Buena, Christmas lights at paputok.
“Dahil ano, para sa Pasko… Sa DTI may regular monitoring siya November and December para doun sa Noche Buena at yung sa mga Christmas lights, ang mga firecrackers,” ani Dalvador.
Iinspeksyunin din ang mga nagtitinda ng paputok, lalo na sa December, upang tingnan kung sumusunod sila sa mga itinakdang rekisito.
“Usually December… Iikutan pa nila yung mga nagtitinda ng mga firecrackers,” aniya.
Samantala, walang Diskwento Caravan na gaganapin sa Palawan ngayong taon dahil sa pag-ikot ng pondo sa limang lalawigan ng MIMAROPA.
Nag-aalok ang programa ng mga produktong may diskuwento para sa mga mamimili.
Tinalakay ang mga hakbang sa Kapihan sa PIA, na isinagawa ng Philippine Information Agency-Palawan at SM City Puerto Princesa bilang bahagi ng Consumer Welfare Month ngayong October.
