Basag ang harapan ng sasakyan ng J&T Express samantalang namatay ang isang kalabaw na aksidenteng nabangga nito sa national highway sa Barangay Malinao, Narra, kaninang pasado alas kwatro ng umaga, Pebrero 7.
Ang drayber ng sasakyan ng J&T Express ay si John Mark Buñag na patungo sana sa mga bayan ng Brooke’s Point at Bataraza para maghatid ng mga parcel. Ang kalabaw na nasawi ay pag-aari umano ng isang Cezar Fraginal, 40 taong gulang.
Ayon kay Buñag, dalawa ang kalabaw na tila naghahabulan sa madilim na bahagi ng kalsada. Pagkatapos ay biglang tumawid ang isa kaya niya nabangga.
“Bale dalawang kalabaw yan. Naghahabulan po sila, tumawid bigla sa kalsada. Madilim yong lugar kaya yon nagulat ako nasa harap ko na. Late na na-apply ang preno ko,” pahayag ni Buñag.
Dinala ang kalabaw sa Narra Slaughter House, habang nakatakda naman silang mag-usap ng may-ari sa barangay.
