Kanta Ang Pagsarig Sa Gino!


“Magalebas ang langit ig ang logta, piro ang Akeng bisara ay indi enged aglebas o madora.” (Matthew 24: 35; Mark 13: 31)

 

Ads

Ang Bisara ang Gino ay ingtaw kanaten para maging gia ta sa ateng kaboi. Indi agkamali ang tao kong tana ay magadason dian. Ingkon ang Dios nga magalebas ang langit ig ang logta piro Anang Bisara ay indi enged aglebas o madora. Ig kong dia ay dadasonon ang maski sino, dan ay poro pakinabang kanana ig beken i kalogian.

 

Maliag kong iprisinta digi ang isara sa paborito ig ingsasarigan kong salmo sa Biblia, ang Psalm 91.

 

1 Tana nga agatingwa ang pag asikaso ang Kataastaasan, ig agatinir sa pangona ang Makagagaem sa tanan;

2 Akakokon sa Gino, “Kota ko Kamo ig balay, Ikaw ang akeng Dios, Dios nga akeng ingsasarigan.”

3  Ikaw ay ililibri Na sa disgrasia, sa maski anong sied, ig maski ano pang mabegat nga sarot indi mo maagian,

4  Tatabonan Na i Anang marabong nga pakpak, sa Anang pag- epet sigoradong libri kaw; babantayan ig Andaman ka Na, tenged nga Tana ay masasarigan.

5  Kong gabi, indi ka’y adlekan sa maski anong bagay, maski pa sa golping pagsonggab pag abot ang adlaw.

6  Maski anono pang magaabot nga sarot pagmadelem den, indi ka’y adlekan sa maski anong kakorian sa kasasanagen.

7  Maski magkaratomba sa imong atobangan ang sakaribong tao, palibot kanimo ay makarapatay ang sampolo ka ribo; indi ka’y adlekan, indi kaw maapiktoan.

8  Magaseleng ka lamang ig makikita mo, nga ang maririmong tao ay ingsisilotan.

9  Tenged nga si Yahweh, imong Gino, ingboboat mong tagabantay, ig ang imong ingpiling magbantay ay ang Kataastaasan,

10  Indo mo’y aboton maski anong kakorian, ig indi karapit maski anong piligro sa imong pamalaybalay.

11  Sosogon Na ang marakeng anghil para magbantay, maski adin kaw magpakon, sigoradong andaman.

12  Sa andang manga palad papatindegen kaw, sanda ang magataas kanimo para sa matatarem nga manga bato imong siki indi maiwan.

13  Maski malapakan mo pa ang manga lion, magkal nga mairiseg, indi kaw andaenged poiding kagaten o sakitan.

14  Ang kon ang Gino, “Ililibri Ko ang sirioso Kanaken, ig babantayan Ko ang maski sinong Ako’y kikilalaen.

15  Kong sanda magtawag, akasimpan Akong sanda ay pamatian, tatabiden sanda ig kong mi piligro Akeng tatabangan; Akeng ililibri ig kada isara ay papadengegan.

16  Tatawan Ko sanda ig kakaloyan i malabeg nga kaboi, makakasigoro nga andang madadangat ay ara kataposang kaboi!”       

 

Indi poiding magbotig ang Gino. Kong dan ingkon Na sa Anang bisara, dato indi Na ren i bagon. Indi Na poiding talikodan Anang inglimeg. Kong paparaeten ang maski sino ang Anang ingkon, dan Tana dian nga pirmi para pamatodan dato.

 

Animan importanti nga magsarig ig magparaet ang Tao sa mga bisara ang Gino. Kong dan maman ang babasian ang pangaboi ang manga tao, dan magaayad anang paneleng sa manga bagay o sitoasion ig magatinlo ang kaboi ang kada isara mi isara kanaten.


You may also like...